Şəhidlər ölməz, Vətən bölünməz!

Bəşər tarixində hər bir dövlət, hər bir millət öz igidləri, şəxsiyyətləri ilə tarixin səhifələrində özünəməxsus iz buraxmışlar. Tarixin hər hansı bir zaman kəsiyində müəyyən bir millətin başını göylərə ucaldan və ya onun şərəfini qoruyan insanlar-həmin millətin tarixini yaradanlardır. İnsan Tanrının ən böyük yaranmışıdır. İnsan öz ömrünü adi bir həyat tərzi kimi də yaşaya bilər, heç bir iz qoymadan dünyadan gedər. Amma, elə insanlar da var ki, qısa bir ömür yaşayır, lakin unudulmaz əməlləri ilə əbədiyyətə qovuşur. Özündən sonrakı nəsillərə örnək olur, vətəni, torpağı, milləti bütün insanlara sevdirməyi öyrədir. Bir anın içərisində ən böyük qəhrəmana çevrilir, insanlığa örnək olur. Yaşadığı torpağa, ailəyə, el-obaya şərəf gətirir, adı gələndə hamı baş əyir. Mübariz İbrahimov, Polad Həşimov, İlqar Mirzəyev, Anar Novruzov, Namiq Əhmədov, Rəşad Mahmudov, Yaşar Babayev, İlqar Zeynalllı, Vüqar Sadıqov, Elşad Məmmədov, Elçin Mustafazadə, Xəyyam Daşdəmirov və Nazim İsmayılov... məhz bir anda vətənin azadlığı uğrunda mübarizədə xalqının, millətinin dilləri əzbəri oldular. Bir anda millətinin Qəhrəmaına çevrildilər. Şəhidlik zirvəsinə ucalmaqla ölümsüzləşdilər. Vətən uğrunda mübarizə aparmış belə öyünüləsi, fəxr ediləsi qəhrəmanlarımız minlərlədir. Hər birinin döyüş yolu bir əfsanə, bir dastan, bir tarix... Bu igidlər qısa bir ömür yaşadılar, əsl vətən oğlunun şətin məqamlarda edə biləcəyi son borcu şərəflə yerinə yetirdilər. Onlar şəhid oldular-gözlərini qırpmadan, dizləri titrəmədən, əlləri əsmədən, ürəyində qorxu xofu yaranmadan. Onlar bilirdilər ki, arxada Vətən-Azərbaycan yaşayır. Şəhid qanları ilə suvarılan vətənin hər qarışı 

müqəddəsdir.

Can deyib qalxdın ayağa,

Canına can qurban şəhid.

Al-qanınla bu torpağa,

Oldun dərdə dərman 

şəhid.

İnanıram ki,  şəhidlərimizin qanı yerdə qalmayacaq. Onların apardıqları haqq işinin nəticəsi tezliklə, müqəddəs, üçrəngli bayrağımızın Qarabağımızda zəfərlə dalğalanması olacaqdır. Tanrı bu işdə xalqımıza, dövlətimizə, başda ali baş komandanımız olan cənab prezident İlham Əliyevə yardımçı olsun! 

Hoydu, dəlilərim, hoydu,

Yeriyin düşmən üstünə.

Havadakı şahin kimi, 

Tökülsün al-qan üstünə!