Dekan müavininin şikayətçi olduğu tələbə ilə bağlı QƏRAR VERİLDİ
Bakı Dövlət Universitetinin (BDU) İlahiyyat fakültəsinin dekan müavini Nigar İsmayılzadənin öz tələbəsi olan Zəka Mirağayevə qarşı qaldırdığı iddia ərizəsinə baxılıb.
Aztəhsil.com Lent.az-a istinadən xəbər verir ki, iddia ilə əlaqədar Yasamal Rayon Məhkəməsində keçirilən prosesdə qərar elan edilib.
Qərara əsasən, tələbəyə Cinayət Məcəlləsinin 148-ci (təhqir) maddəsi ilə bəraət verilib. Lakin həmin məcəllənin 147-ci (ağır cinayətdə ittiham etməklə böhtan atma) maddəsi ilə günahkar bilinib və aylıq 15 faiz əməkhaqqıdan tutulmaqla 1 il müddətinə islah işləri cəzasına cəlb edilib.
Xatırladaq ki, Zəka Mirağayev məhkəmənin ədalətli qərar çıxarmayacağına güman edərək ölkəni tərk etmişdi. Zəka Mirağayev Gürcüstandan Bakıya qayıdarkən aeroportda saxlanılıb və polisə təhvil verilib. Bir müddət sonra isə buraxılıb.
Qeyd edək ki, Nigar İsmayılzadə Zəka Mirağayevin Cinayət Məcəlləsinin 147.2-ci (ağır cinayətdə ittiham etməklə böhtan atma) və 148-ci (təhqir) maddəsi ilə də cəzalandırılmasını istəyib. İttihamçı "anaxeber” saytında yer almış yazıdakı "Nigar İsmayılzadə "İlahiyyat” fakültəsinin adına layiq deyil” cümləsini təhqir hesab edir.
