“Müəllimlər otağı”nda şagirdlər bəyəndikləri dərs metodları haqqında fikirlərini bölüşəcəklər

Təhsildə inkişaf və innovasiyalar üzrə birinci qrant müsabiqəsinin fərdi kateqoriya üzrə qalibi olmuş "Müəllimlər otağı” layihəsi çərçivəsində müəllimlərin təcrübə mübadiləsini təşkil etmək məqsədilə online platforma yaradılır.

Aztəhsil.com azərtac.az-a istinadən xəbər verir ki, platformada, həmçinin təlim-tədris metodları bir arada toplanacaq. Bunun üçün "Müəllimlər otağı” layihəsi çərçivəsində www.muellimlerotagi.az  veb səhifəsi hazırlanır.

Müəllimlərin təcrübə mübadiləsinin təşkili üçün "Müəllimlər otağı”nda forum da nəzərdə tutulub. Bununla yanaşı, hazırda müəllimlərlə onların tədris metodu haqqında söhbətlər aparılır, maraqlı metodlar toplanılır.

Artıq bir sıra məktəblərdən müəllimlər öz təcrübələrini "Müəllimlər otağı”nda paylaşıb. Eyni zamanda, "Müəllimlər otağı”nda şagirdlər müəllimləri və bəyəndikləri dərs metodları haqqında fikirlərini bölüşəcəklər. Bunun üçün şagirdlər "Hansı dərs daha çox diqqətinizi çəkir? Niyə?” suallarına cavab verəcəklər.

Platformada məzunların da fikirlərinə yer veriləcək. Bu məqsədlə onlar ən çox bəyəndikləri dərsdən və bunun səbəbindən söhbət açacaqlar. Layihə çərçivəsində yerli müəllimlərlə yanaşı, xarici ölkə müəllimlərinin də təcrübəsi öyrəniləcək. Hazırda bunun üçün əcnəbi müəllimlərlə danışıqlar aparılır.

Bakı şəhəri 36 nömrəli tam orta məktəbin Azərbaycan dili və ədəbiyyat müəllimi Zülfiyyə Aslanbəylini rəhbərliyi ilə fərdi kateqoriyada qalib olmuş "Müəllimlər otağı” layihəsinin icra müddəti 3 aydır.

Qeyd edək ki, təhsildə inkişaf və innovasiyalar üzrə birinci qrant müsabiqəsi Təhsil Nazirliyi tərəfindən dövlət ümumtəhsil müəssisələri və bu müəssisələrdə çalışan pedaqoji işçilər üçün elan olunub.

Müsabiqə çərçivəsində ümumtəhsil müəssisələri kateqoriyası üzrə 78 layihədən 37-si, fərdi kateqoriya üzrə isə 213 layihədən 83-ü olmaqla ümumilikdə 120 layihə qalib elan edilib.