Xəbərlər / Müəllim
29 sentyabr 2021
1 345
Bu gündən yuxarı sinif şagirdləri və tələbələr üçün dərslər başlayır
Bu gündən ölkə üzrə ümumi təhsil müəssisələrinin bütün sinifləri üzrə, eləcə də məktəbdənkənar, peşə, orta ixtisas və ali təhsil müəssisələrində ənənəvi şəkildə tədrisə başlanılır.
2021-2022-ci tədris ilində respublikanın ümumi təhsil müəssisələrində ümumilikdə 1 589 829 şagirdin təhsil alacağı proqnozlaşdırılır.
Məlumata görə, ümumtəhsil məktəblərinin IX sinfində 132 881, XI sinfində isə 91 538 şagird təhsil alacaq. Həmçinin ali təhsilin bakalavr pilləsi üzrə 171 820, magistr pilləsi üzrə 16920 tələbənin, orta ixtisas təhsili üzrə 57 693 subbakalavrın təhsil alacağı proqnozlaşdırılır.
Paytaxtdakı məktəblərə gəlincə isə, Bakı Şəhəri üzrə Təhsil İdarəsindən (BŞTİ) Oxu.Az-ın sorğusuna cavab olaraq bildirilib ki, qurumun tabeliyindəki təhsil müəssisələrinin V-XI siniflərində 244 054 şagird təhsil alacaq.
BŞTİ-nin tabeliyində fəaliyyət göstərən ümumi təhsil müəssisələri üzrə ümumilikdə, 471 661 şagird var.
BŞTİ-nin tabeliyindəki ümumi təhsil məktəblərinin I sinfində 49 171, IX sinfində 36 199, X sinfində 27 016, XI sinfində 23 707, XII sinfində 176 şagirdin təhsil alacağı proqnozlaşdırılır.
Xatırladaq ki, ümumi təhsil müəssisələrinin I-IV sinifləri üzrə ənənəvi tədrisə sentyabrın 22-dən başlanılıb. Ümumtəhsil məktəblərinin I sinfində 158 608 şagird təhsil alır.
Məlumat üçün bildirək ki, tədrisin gec başlaması ilə əlaqədar olaraq keçirilməyən dərs saatları tədris ili ərzində tətil günləri hesabına bərpa olunacaq.
