Xəbərlər / Müəllim
02 iyul 2021
1 612
DİM qabiliyyət imtahanı verəcək abituriyentlərə müraciət etdi
Dövlət İmtahan Mərkəzi (DİM) bədən tərbiyəsi və idman istiqaməti üzrə 84 və ya 85 nömrəli komissiyaları seçmiş abituriyentlərə müraciət edib.
DİM-dən verilən məlumata əsasən, abituriyentlər məşqçilik (84), fiziki tərbiyə və çağırışaqədərki hazırlıq müəllimliyi (85) komissiyaları üzrə buraxılış vərəqələrini aşağıdakı link vasitəsilə çap edə bilərlər.
Bədən tərbiyəsi və idman istiqaməti üzrə qabiliyyət imtahanına gələcək hər bir abituriyent komissiyaya sağlamlıq haqqında arayış təqdim etməlidir (forma-86). İmtahana gələrkən idman forması gətirməyən abituriyentlər qabiliyyət imtahanlarına buraxılmırlar.
Abituriyentlər buraxılış vərəqəsi ilə bir yerdə "İmtahan iştirakçısının sağlamlığı haqqında bəyannamə”ni də çap edirlər. Bəyannamə ayrıca vərəqdə çap edilməlidir və imtahan günü abituriyent tərəfindən imzalanmaqla imtahan nəzarətçisinə təqdim edilməlidir.
İmtahana mobil telefon və ya əlavə ötürücü qurğu gətirən şəxslər imtahandan xaric ediləcəklər. İmtahan qaydalarını pozan şəxslərin imtahan nəticələri ləğv ediləcəkdir. İmtahanın nəticəsindən narazı olan bakalavrlar həmin gün ərizə vasitəsilə apellyasiyaya müraciət edə bilərlər. Apellyasiya həmin gün imtahan binasında təşkil edilir. Təkrar imtahan götürülməsi ilə bağlı müraciətlərə baxılmır.
