Qələbə qazanan Azərbaycanlıların həmrəyliyini və birliyini dünyaya nümayiş etdirmək məqsədi ilə beynəlxalq marafon-auksionu keçirilib.

Xarıbülbül Aksiyası” xeyriyyə layihəsi davam edir və ilk beynəlxalq onlayn marafon-auksion isə başa çatıb

"EkoSfera” Sosial-Ekoloji Mərkəzinin təşkilatçılığı ilə 30-31 dekabr 2020-ci il tarixlərində və əlavə olaraq iştirakçıların xahişi ilə 5 yanvar 2021-ci il tarixində I və II Qarabağ Müharibəsində şəhid olanların xatirəsinə və Azərbaycan xalqının şərəfli qələbəsinə həsr olunmuş "Xarıbülbül Aksiyası” yaradıcılıq müsabiqəsinin qaliblərinin onlayn mükafatlandırma mərasimi və 20 saatlıq xeyriyyə beynəlxalq marafon-auksionu keçirilib.

Aksiyanın və beynəlxalq onlayn marafonun əsas məqsədi Qələbə qazanan azərbaycanlıların həmrəyliyini və birliyini dünyaya nümayiş etdirməkdən ibarət idi.

Təşkilatın rəhbəri və "Xarıbülbül Aksiyası” ideyasının təşəbbüskarı Firuzə Sultan-zadənin qeyd etdiyi kimi, bu, hər bir azərbaycanlının ruhunda, ölkəmizin Ali Baş Komandanı İlham Əliyevlə birlikdə hamının birliyində mühüm bir hadisədir!

Azərbaycan Prezidenti İlham Əliyevin xalqa müraciətində söylədiyi bu sözlər hamımız üçün əsasdı: "Bu gün biz bir daha bütün dünyaya böyük və qürurlu bir xalq olduğumuzu sübut etdik! Biz yenilməz bir xalqıq. Döyüş meydanında düşmənə yerini göstəririk! Bu günlərdə dəfələrlə Azərbaycan xalqına müraciət edərək düşmənə yumruq göstərmişdim, yumruq göstərmişdim. Demişdim ki, bu yumruq elə belə yumruq deyil. Bu, dəmir yumruqdur. Bu dəmir yumruqla düşmənin başını əzirik və əzəcəyik! Eyni zamanda, bu yumruq birliyimizin rəmzidir. Bax, bu gün Azərbaycan xalqı bu yumruq kimi birləşib! Həmişə belə olacaq! Bu birlik əbədi olacaq! Bu birlik bizə gələcəkdə də bütün vəzifələri icra etmək üçün imkan yaradacaq.

Biz ölkə daxilində uğurlu siyasət apararaq hesab edirəm ki, ölkəmizdə dünya üçün çox nadir inkişaf modelini yaratdıq. Daxildəki həmrəylik, milli birlik, vahid amal uğrunda birləşməyimiz bizə əlavə güc verdi, imkan vermədi ki, bəzi mənfur xarici dairələr öz çirkin planlarını Azərbaycanda həyata keçirsinlər. Biz siyasi iradə göstərərək, birlik göstərərək bu cəhdləri dəf etdik, xalq olaraq, millət olaraq öz qürurumuzu müdafiə etdik, öz müstəqil seçimimizi müdafiə etdik və sübut etdik ki, heç kim bizim işimizə qarışmasın və qarışa bilməz. Əgər bu birlik olmasaydı, milli həmrəylik olmasaydı, biz heç vaxt torpaqlarımızı işğalçılardan azad edə bilməzdik”.

"Azərbaycanın mədəni müxtəlifliyini və sərvətini bir daha nümayiş etdirmək, bizə qarşı edilən mədəni soyqırımı, musiqimizi, memarlığımızı və abidələrimizi, yeməklərimizi xatırlatmaq da vacib idi!" - deyə Firuzə Sultan-zadə qeyd edib. Bunu etmək üçün, görkəmli mədəniyyət və incəsənət xadimlərini marafon zamanı çıxış etməyə dəvət etdik və onlayn formatda keçirilən marafon saytlarda, sosial şəbəkələrdə həmçinin tərəfdaşlarımızın səhifələrində qeyd yazılarla yayımlandı.

30 dekabr tarixində - yaradıcılıq müsabiqəsi iştirakçılarının döş nişanları və broşlar məhsulları onlayn formatda nümayiş olundu. Burada həm peşəkar zərgərlər, dekorativ və tətbiqi sənət ustaları, həm də qeyri-peşəkar, eləcə də 6 yaşdan 15 yaşadək uşaqlar iştirak edirdi. Bütün iştirakçılar üzrə ümumilikdə 45 məhsul təqdim edildi və müsabiqənin laureatları seçildi. Onlara xatirə diplomları təqdim olunacaq. Üç tələbi yerinə yetirmək üçün xüsusi mükafat – tətbiqetmənin asanlığı, yaradıcılığı və vəsaitin mövcudluğuna (əlçatanlığına) uyğun olaraq – ilk iki qalib arasında bölüşdürüldü – onların əl işləri "EkoSfera” Mərkəzi tərəfindən istifadə üçün təkrarlanacaq – böyüklər arasında Böyük Britaniyadan Afsana Boate və Azərbaycandan Marina Vəliyeva. Uşaq qrupu arasında döş nişanları və xatirə stikerləri istehsalına dair öz layihələri ilə fərqləndilər - Bilalova Ceyla (11 yaş), Məmmədli Emil (12 yaş), Rzayev Rəsul (7 yaş).

31 dekabr tarixində, səhər saat 8:00-dan axşam 20:00-a qədər fasiləsiz olaraq auksionda Xarıbülbül təsviri olan rəsm əsərləri, kitablar, aksessuarlar, bu çiçək şəklində döş nişanları və broşlar, milli suvenirlər və s. xalq sənəti ustalarının, sənətkarların, həvəskar iştirakçıların məhsulları təqdim edildi. "Foglie D'alloro”, "I love Baku”, "Minalı”, "Butalı Azerbaijan Jewelry”, "Galemkari Style by FR Collection”, "Zadagan”, "Sabikhan”, "Asul", "Azəripək", "Ag Ciceyim” və digər şirkətlər dəstəyə fəal qatıldı və hərraca məhsullar bağışladılar. Azərbaycanın 100-dən çox dekorativ-tətbiqi sənət ustası, sənətkarları və rəssamları iştirak etdi.

Auksion zamanı hər saat üzrə fəxri qonaqlar çıxışları ilə proqramı dəstəklədilər – Firuzə Sultan-zadə – ekologiya üzrə fəlsəfə doktoru, "EkoSfera” SEM-in rəhbəri, "Tərəqqi” medalı və ictimai orden "Qızıl Ürək” mükafatçısı, Günay Məlikqızı – Milli Olimpiya Komitəsinin mətbuat xidmətinin rəhbəri, Tahir Əmiraslanov – Əməkdar mədəniyyət işçisi, Azərbaycan Milli Kulinariya Mərkəzinin prezidenti, Cahangir Səlimxanov – Əməkdar incəsənət xadimi, musiqişünas, sənətşünaslıq doktoru, Əminə Məlikova – Əməkdar mədəniyyət işçisi, İçərişəhər Muzey Mərkəzinin direktoru, Fəxriyyə Xələfova – Əməkdar incəsənət xadimi, rəssam-modelyer, Fikrət Abdullayev – Əməkdar mədəniyyət işçisi, tarix üzrə fəlsəfə doktoru, Qobustan Dövlət Tarixi-Bədii Qoruğunun direktor müavini, Fuad Axundov – tarixçi, memarlıq tədqiqatçısı, "Bakının sirləri" proqramının müəllifi, Cavid İmamverdiyev – azərbaycanlı rejissor, ssenari müəllifi, Kamran Kərimov – Azərbaycanın əməkdar artisti, professor, musiqiçi, nağara ifaçısı və eyni zamanda auksionda marafon zamanı dinləyicilər, Azərbaycan mədəniyyəti, dizaynı, musiqisi, tarixi, dəbi və aşpazlığı sahəsindəki digər mütəxəssislər iştirak etdi.

Xaricdə yaşayan azərbaycanlılar, eləcə də diaspor nümayəndələri "EkoSfera” Mərkəzi tərəfindən auksiona cəlb edilib. Auksiona hazırlıq dövründə qısa müddət ərzində Florida ştatındakı azərbaycanlı qrupunun rəhbəri Tofa Eminova – Florida Azərbaycan-Amerika Mədəniyyət Assosiasiyasının prezidenti, İradə Əhmədova – Texas-Hyuston Azərbaycan Mərkəzinin prezidenti, Seva Əzimova – Konnektikutdakı Azərbaycan Amerika Cəmiyyətinin vitse-prezidenti, Afsana Boate – Azərbaycan-İngilis qrupunun fəal üzvü və "Xarıbülbül" müsabiqəsinin qalibi auksiona qatılıblar.

"EkoSfera" Sosial-Ekoloji Mərkəzi bu məhsulların satışından toplanan vəsaiti Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fonduna ("YAŞAT" Fondu) bağışlayacaqdır. Toplanan ianənin məqsədi uşaqlara əlavə təhsil və psixoloji reabilitasiya üçün imkanlar əldə edilməsinə dəstək olmaq idi.

Qeyd edək ki, bu müsabiqənin məqsədlərindən biri də əlamətdar günlərdə – 27 sentyabr Anım Günü, 8 Noyabr Zəfər Günü və 31 Dekabr Dünya Azərbaycanlılarının Həmrəyliyi Günündə Zəfər və Azərbaycan xalqının birliyi olaraq Xarıbülbül rəmzinin taxılması ənənəsini yaratmaqdır. Növbəti "Xarıbülbül Aksiyası" onlayn marafonunun cari ildə yaz fəslində Novruz bayramı ərəfəsində keçirilməsi nəzərdə tutulur.