Xəbərlər / Şagird
07 iyun 2020
1 287
"İnklüziv təhsil: əlilliyə fərqli baxış"
Heydər Əliyev Fondunun "Regional İnkişaf” İctimai Birliyi tərəfindən icra olunan "Müəllimlərin inklüziv təhsil sahəsində bacarıqlarının artırılması” və UNİCEF-in Azərbaycan nümayəndəliyinin həyata keçirdiyi "Azərbaycanda əlilliyi olan uşaqlar üçün keyfiyyətli inklüziv təhsilin genişləndirilməsi” layihələri çərçivəsində Bakı Dövlət Universitetinin (BDU) müəllim-tələbə heyəti ilə "İnklüziv təhsil: əlilliyə fərqli baxış” mövzusunda onlayn görüş keçirilib.
BDU-dan bildirilib ki, universitetin sosial elmlər və psixologiya fakültəsinin dekanı, professor Hikmət Əlizadə inklüziv təhsilin inkişafının dünyanın bir çox ölkələrinin təhsil siyasətinin əsas prioritetlərindən olduğunu və təhsil sisteminin beynəlxalq standartlara uyğunlaşdırılması məqsədini daşıdığını söyləyib. "Təlim metodikasına müvafiq olaraq inklüziv təhsil uşaqlara qarşı hər hansı formada ayrı-seçkilik edilməsinin qarşısını alır, müxtəlif nevroloji və ya psixi xəstəlikləri olanlara belə mükəmməl şəkildə təhsil almaq, uğur qazanmaq imkanı verir. Onun əsas vəzifəsi məhdud imkanlara malik insanların peşə hazırlığı üçün sərhəd tanımayan mühit yaratmaqdır”-deyən H.Əlizadə Azərbaycanın 1992-ci ildə İnsan Hüquqları Konvensiyasını imzalayaraq, inklüziv təhsilin inkişafı istiqamətində mühüm işlər gördüyünü diqqətə çatdırıb.
Zoom platforması üzərindən baş tutan görüş "Regional İnkişaf” İctimai Birliyinin inklüziv təhsil üzrə mütəxəssisi Fərid Süleymanovun moderatorluğu ilə davam edib.
Motivasiya spikeri, tərcüməçi, yazar və "ƏSA” teatrının aktrisası Cəmilə Məmmədli həyatından, uğurlarından, nailiyyətlərindən danışaraq ingilis dilini öyrəndiyini, tərcümələr etdiyini, hekayələr yazdığını vurğulayıb. Oxucularının ona stimul verdiyini deyən gənc hekayə yazmağın onu həyatda irəliyə aparan ən vacib məqam olmasından bəhs edib. Hazırda yapon dili kursuna getdiyini deyən C. Məmmədli ən böyük arzusunun universitet təhsili almaq olduğunu söyləyib.
Onlayn görüşün keçirilməsinin əsas məqsədi inklüziv təhsilin əhəmiyyətini, əlilliyi olan insanların cəmiyyətə inteqrasiyasının vacibliyini ictimaiyyətin diqqətinə çatdırmaqdır.
