Xəbərlər
14 yanvar 2017
5 285
ADPU-da doktoranturaya və dissertanturaya qəbul imtahanları və müsahibə başa çatıb
Azərbaycan Respublikası Təhsil Nazirliyinin müvafiq məktubuna əsasən Azərbaycan Dövlət Pedaqoji Universitetində (ADPU) fəlsəfə doktoru hazırlığı üzrə doktoranturaya və dissertanturaya, elmlər doktoru hazırlığı üzrə dissertanturaya qəbulla bağlı «Azərbaycan» qəzetinin 29 noyabr 2016-cı il tarixli nömrəsində elan dərc edilmiş, 16 dekabr 2016-cı il tarixə qədər sənəd qəbulu aparılıb. Planda nəzərdə tutulmuş ixtisaslar üzrə cəmi 80 nəfərin sənədi (fəlsəfə doktoru proqramı üzrə doktoranturaya 40 sənəd, dissertanturaya 27 sənəd, elmlər doktoru proqramı üzrə dissertanturaya 13 sənəd) qəbul edilib. Qeyd edək ki, ADPU-nun rektoru, professor Cəfər Cəfərovun 30 noyabr 2016-cı il tarixli 3/399 nömrəli əmrinə əsasən yaradılmış Sənəd Qəbulu Komissiyasının 20 dekabr 2016-cı il tarixli iclasının qərarına əsasən qəbul imtahanlarına fəlsəfə doktoru hazırlığı üzrə dokto¬ranturaya 1 nəfər, qəbul müsahibəsinə fəlsəfə doktoru hazırlığı üzrə dissertanturaya 8 nəfər, elmlər doktoru proqramı üzrə dissertanturaya 2 nəfər buraxılmayıb. Müvafiq komissiyalar tərəfindən 22 dekabr 2016-cı il tarixdən 10 yanvar 2017-ci il tarixə qədər imtahanlar və müsahibələr obyektiv və şəffaf aparılıb. Rektor Cəfər Cəfərov və Elmi işlər üzrə prorektor, professor Asəf Zamanov prosesə ciddi nəzarət ediblər. İmtahan və müsahibələrin nəticələri əsasında fəlsəfə doktoru hazırlığı üzrə doktoranturaya 12 nəfər, fəlsəfə doktoru hazırlığı üzrə dissertanturaya 7 nəfər, elmlər doktoru hazırlığı üzrə dissertanturaya 5 nəfər qəbul edilib.
Yanvar ayının 13-də rektor qəbul edilmiş şəxslərlə görüşüb, onları təbrik edərək və gələcək elmi fəaliyyətlərində uğurlar arzulayıb. Elmi işlər üzrə prorektor, professor Asəf Zamanov doktoranturaya və dissertanturaya qəbulla əlaqədar hesabat verərək təkliflərini bildirib. Azərbaycan dili və onun tədrisi metodikası kafedrasının müdiri, professor Əzizxan Tanrıverdiyev çıxış edərək onlara yüksək səviyyəli alim kimi yetişməyi arzulayıb. Doktoranturaya və dissertanturaya qəbul olunanlar imtahanların və müsahibələrin şəffaf və obyektiv keçirilməsinə görə ADPU-nun rəhbərliyinə təşəkkür edərək onlara göstərilən etimadı doğruldacaqlarına söz veriblər. Sonda doktoranturaya və dissertanturaya qəbul olunanlara vəsiqələr təqdim edilib.
aztehsil.com
