Xəbərlər / Magistr
26 fevral 2019
2 125
Acı təəssüratlar
Dövlət İmtahan Mərkəzi tərəfindən ali təhsil müəssisələri və AMEA-nın magistraturalarına qəbul imtahanının birinci mərhələsi 2019-cu il 24 fevral tarixində keçirilib.
Magistraturaya qəbul imtahanının ikinci mərhələsi mayın 26-da baş tutacaq.
Bəs, imtahanda iştirak edən bakalavrların imtahan təəssüratları necə olub?
Nigar Seyidova qeyd edir ki, o, Məntiqin bu qədər çətin olacağını gözləmirdi. Onun sözlərinə görə, iştirak etdiyi sınaqlarla qəbul imtahanı arasında çox fərq var idi:
"Sınaqlarda suallar çox rahat olurdu deyə, düşünürdüm ki, dəqiq 65-dən çox bal toplayacağam. İndi nəticələr elan olunmasa da, açığı heç ümidim yoxdu, yüksək bal toplayacağıma. İnformatikada bir sual ümumiyyətlə, qaranlıq qaldı. İki düzgün variant var idi. Amma sual tam yadımda qalmadığı üçün müəllimlə dəqiqləşdirə bilmirəm”.
Əjdər Əliyev də "həmkarı” ilə razıdır. O, bildirir ki, Məntiq fənnini yaxşı mənimsəsə də, imtahanda yaxşı nəticə göstərə bilməyib:
"Magistraturaya əsgərlikdən qalmaq üçün hazırlaşıram deyə, nəticənin zəifliyi, məni çox da narahat etmir. "Listening” sualları mənə olduqca çətin gəldi, çünki səsləndirənlərin səs tonu, ləhcəsi qəribə idi. Tam anlamaq olmurdu. MBA üzrə keçid balı çox olmur deyə, qəbul olunacağımı düşünürəm. Onsuz da, ödənişli təhsildi də, niyə keçid balını yüksək etsinlər ki?”
Nərminə Musayevanın fikrincə, informatikadan təqdim edilən suallar digərlərinə nisbətən daha çətin olub:
"İnformatikadan 10-15 düz yazdığımı düşünürəm. Çaşdırıcı suallar çox idi, bəzilərində 2 variant düz idi. Məntiqi yaxşı yazmışam, "üzümü ağ eləsə” elə o edəcək. Düşünürəm ki, keçid balları azaldılacaq”.
Samir Musayev təklif edir ki, keçid balları əvvəlki illərə nisbətən aşağı salınsın:
"Çünki, onsuz da ilk dəfə idi ki, audiomətn təqdim edilirdi, yəni bu, kifayət qədər həyəcan verirdi. Üstəlik də, testləri bu qədər qəliz tərtib etməyin adı nədi?! Başa düşmürəm, niyə əvvəl rahat olacaq deyib, sonra imtahanı çətin təşkil edirlər?! Əvvəldən xəbər etsinlər, işimizi bilək. Bilsəm, belə olacaq, heç hazırlaşmazdım imtahana. Uşaqların çoxu deyir ki, sınaq imtahanında suallar asan idi, amma mən razı deyiləm. Ümumiyyətlə, bu qədər qəliz təşkil edilməsinə ad verə bilmirəm. Magistr olmağımız üçün şərait yaradılmalıdır”.
Leyla Süleymanova bildirib ki, o, DİM-in bakalavrları bu formada arxayınlaşdırıb birdən çətinliyə salmasını anlaya bilmir. Onun sözlərinə görə, xarici dildən təqdim edilən suallar daha rahat idi:
"Fevralın 3-ü DİM-in keçirdiyi magistratura sınağında iştirak etmişəm. Orada suallar çox asan tərtib edilmişdi. Yəni, sınaqda iştirak edən hər kəs qəbulda daha asan suallar gözləyirdi. Ən azından əvvəlki illərdə də qəbul sualları, sınaqdakından müəyyən qədər asan salınıb. Qəbulda isə tam fərqli mənzərə ilə qarşılaşdıq: testlər, xüsusilə də məntiq çox çətin tərtib edilmişdi, fərqli tip məsələlərə rast gəlinirdi. Təşkil etdikləri sınaq qəbulla uzlaşmırdı, xüsusilə də mətnin məntiqi təhlilinə aid testlər hədsiz çətin idi. Həmin sualları cavablamaq üçün bakalavr 5-6 dəq düşünməlidir, buna isə imtahanda vaxt çatdırmaq olmur.
Alman dilinin sualları isə əksinə, asan idi. B2 səviyyə gözləsək də, A2 səviyyədə olan birinin də cavablaya biləcəyi suallar idi. İnformatika sualları ümumiyyətlə, kitabda diqqət etmədiyim məqamlardan salınmışdı. Ötən ilin qəbulunda 41 məntiq işləsəm də, builki suallarla onu etmək mümkün deyildi. Qəbulda keçid balını toplayacağıma ümid edirəm”.
Şakir Həsənov bildirib ki, o, artıq informatikadan yazdığı testləri yoxlatdırıb:
"Mənə də elə gəlirdi ki, çox çətindi suallar, düzgün cavablarım çox az olacaq, amma nəticə bir az yaxşı oldu. Sosial şəbəkələrdə informatika test vərəqələri paylaşılırdı. Gördüm ki, elə mənə düşən variantdır. Müəllimimlə yoxladıq, 19 düzgün cavab çıxdı. İnşallah kodlaşdırmada səhvə yol verməmişəm”azedu.az
