Şabran - "Uşaq və gənclərin ən yaxşı yaradıcılıq işləri” respublika müsabiqəsinin rayon mərhələsi keçirilib.

15 oktyabrda Şabran Rayon Təhsil Şöbəsi tərəfindən şəhər 4 nömrəli tam orta məktəbdə 2 mərhələdən ibarət "Uşaq və gənclərin ən yaxşı yaradıcılıq işləri” respublika müsabiqəsinin rayon mərhələsi keçirilib.

Müsabiqədə rayon ümumtəhsil və internat məktəblərinin şagirdləri, məktəbdənkənar təhsil müəssisələrinin dərnək üzvləri iştirak ediblər.

Müsabiqə aşağıdakı incəsənət növləri üzrə təşkil olunub:

I. Dekorativ tətbiqi sənət – bədii tikmə, makrame, toxuma, xalçaçılıq, yumşaq oyuncaq, ağac üzərində oyma, keramika, şəbəkə, vitraj (şüşə üzərində təsvir), kəlağayı, aplikasiya, oriqami, misgərlik (metal üzərində cızma və döymə), muncuqlardan, müxtəlif təbiət nümunələrindən (bitki, tum, balıqqulağı) kompozisiya və ikebanaların hazırlanması.

II. Dizayn – geyim, nəqliyyat vasitələri, interyer və eksteryer dizaynı nümunələrinin, hər hansı bir məhsulun əmtəə nişanının hazırlanması.

Şagirdlərin əl işlərindən ibarət sərgi izləyənlər tərəfindən maraqla qarşılanıb. Münsiflər heyəti tərəfindən seçilən əl işləri I, II, III yer olaraq müəyyənləşdirilib. Müsabiqənin qalibləri Rayon Təhsil Şöbəsi tərəfindən diplom və hədiyyələrlə təltif olunublar.

Qeyd edək ki, müsabiqənin rayon mərhələsində I və II yerə layiq görülən işlər respublika mərhələsində iştirak etmək hüququ qazanıblar.

Müsabiqənin keçirilməsində əsas məqsəd istedadlı uşaq və gənclərin üzə çıxarılması, onların yaradıcılıq potensialının inkişaf etdirilməsi, habelə uşaq və gənclərin yaradıcılıq mərkəzlərinə daha geniş cəlb olunması, uşaq yaradıcılıq mərkəzləri arasında təcrübə mübadiləsinin təşkilidir.

Gülər Hüseynova. Şabran.