Xəbərlər
09 avqust 2018
1 955
“Növbəti ildən DİM jurnalistika ixtisasına qeydiyyatı ödənişli şəkildə həyata keçirməlidir” – Ekspertdən təklif
Artıq bir neçə ildir ki, ali təhsil müəssisələrinin jurnalistika ixtisasına qəbul təkcə test imtahanında göstərilən nəticə ilə deyil, müsabiqə şərtlərini ödəyən abituriyentlər üçün inşa (yazı) müsabiqəsi keçirilməklə biliklərinin yoxlanılması ilə həyata keçirilir. Lakin bu gün Dövlət İmtahan Mərkəzi (DİM) 2018/2019-cu tədris ili üçün ali təhsil müəssisələrinin bakalavriat səviyyəsinin "Jurnalistika” ixtisasına qəbul olmaq istəyən abituriyentlər üçün avqustun 6-da keçirilən qabiliyyət imtahanının nəticələrini elan edib və məlum olub ki, imtahanda iştirak etmək hüququ qazanmış 446 abituriyentdən 104 nəfəri imtahana gəlməyib.
Aztehsil.com-un məlumatına görə, məsələ barədə Bizimyol.info -ya açıqlama verən təhsil eksperti Kamran Əsədov abituriyentlərin bu hərəkətinin məsuliyyətsizlik olduğunu və DİM-in sözügedən mövzuda öz gücünü ortaya qoymasının vacibliyini bildirib:
"Birincisi, bu məsuliyyətsizlikdir. Ona görə ki, DİM qeydiyyatdan keçmiş şəxslərin hamısı üçün xərc ödəyərək hazırlıq işləri görüb. Yəni 400 nəfərdən çox şəxsin gəlməsi nəzərdə tutulduğuna görə, nəzarətçi, kağız və s. də o saya uyğun olaraq planlaşdırılıb. Hesab edirəm ki, növbəti ildən etibarən DİM jurnalistika ixtisasına qeydiyyatı ödənişli şəkildə həyata keçirilməlidir ki, insanlar öz seçimlərinə məsuliyyətli yanaşsınlar və adıçəkilən qurum əlavə xərcə düşməsin. Abituriyentlərin qabiliyyət imtahanına gəlməməklərinin digər səbəbi isə odur ki, onların qəbul imtahanında topladıqları bal yetərlidir və həmin bal ilə digər ixtisaslara qəbul ola bilirlər. Təəssüflər olsun ki, hazırda o şəxslər jurnalistika ixtisasını seçirlər ki, onlar qəbul imtahanında aşağı bal toplayıblar və son ümid yeri olaraq sözügedən fakültəni seçirlər. Qabiliyyət imtahanı tətbiq edilməmişdən əvvəl jurnalistika ixtisasına 500 və daha yüksək bal ilə qəbul olmaq mümkün idisə, son illər (qabiliyyət imtahanı tətbiq edildikdən sonra) jurnalistikaya 200 bal ilə də qəbul olmaq mümkündür. Buna görə də mən hesab edirəm ki, iki üsul tətbiq olunmalıdır. Birinci abituriyentlərdə məsuliyyət hissini artırmaq lazımdır, ikinci inşadan sonra müsahibə mərhələsi keçirilməlidir. Bu məsələdə DİM öz gücünü ortaya qoymalıdır”.
