Xəbərlər / Kitabxanaçı / Valideyn / Direktor / Müəllim / Layihə
26 yanvar 2018
5 818
Təhsil sisteminin “qorxulu yuxusu”, məktəblərdə paylanan “dadlı konfetlər”... -Həftənin icmalı LAYİHƏ
Elə adamlar axtarın ki, onlarla söhbət yaxşı kitaba bərabər olsun,
Elə kitablar da axtarın ki, mütaliəsi filosoflarla söhbətə dəysin.
Həftənin icmalını təqdim edirik:
Təhsil sisteminin "qorxulu yuxusu” necə bitəcək?
Yola saldığımız həftə ümumtəhsil məktəblərində summativ qiymətləndirmənin ləğv olunması məsələsinin gündəmə gəlməsi ilə yadda qaldı.
Təhsil Nazirliyindən bildirildi ki, summativ qiymətləndirmə ilə bağlı sənəd təhsil mütəxəssisləri ilə birgə müzakirə olunur. Layihə sənədi hələ ki, müzakirə mərhələsindədir.
Kurikulumun "ağlaşmaya” səbəb olduğu bir vaxtda summativ qiymətləndirmənin ləğv oluna biləcəyi ehtimalı təhsil camiasında yeni ümidlərin cücərməsinə səbəb oldu. Birinci siniflərdə summativ qiymətləndirmənin, 2-ci və 4-cü siniflərdə isə böyük summativ qiymətləndirmənin ləğv olunması, yalnız kiçik summativlərin saxlanılması təklif olunur.
5-9-cu siniflərdə bütün fənlər üzrə kiçik summativlərin, yalnız buraxılış imtahanlarına daxil olan fənlər üzrə böyük summativlərin aparılması təklif edilir. Təklif təsdiq olunacağı halda 2018-2019-cu tədris ilində tətbiq ediləcək.
Məktəb ətraflarında paylanan "dadlı konfetlər”...
Uşaqların sevimli şirniyyatları konfetlər... Onlar uşaqların yox deməyəcəyi yeganə şirin sevinclərdir... Bir neçə gündür ki, sosial şəbəkələrdə hər kəsi, xüsusən də valideynləri narahat edən bir məsələ geniş şəkildə müzakirə olunmaqdadır.
Bakı şəhəri Nəsimi rayonu Tahir Həsənov adına 23 saylı orta məktəb və Səbail rayon 6 saylı məktəb-liseyin ətrafında şagirdlərə narkotik tərkibli konfetəbənzər həblərin verilməsi ilə bağlı "Whatsapp” şəbəkəsində səs yazısı yayılıb. Səs yazısını yayan naməlum qadın özünü valideyn kimi təqdim edərək uşaqlara təhlükəli həblərin paylanıldığını deyib. Bundan sonra səs yazısı sürətlə yayılmağa başlayıb.
Nazirlik isə sözügedən məsələnin həqiqəti əks etdirmədiyini bildirir.
Belə yerdə yaxşı deyiblər, ehtiyat igidin yaraşığıdır... Diqqətli olmaq mütləqdir!
"Heç orfoqrafiya lüğətinə də inam olar?”
Qəribə hadisələr baş verir. Özü də təkcə ictimai həyatda yox, birbaşa dilimizin Konstitusiyası sayılan "Orfoqrafiya lüğəti"ndə.
Nə baş verir axı? – Bilmirik, bir də ayıldıq ki, hər şey baş-ayaq olub.
"Çırtı-pırtı”, "çıpaçıp”, "dit-dit”... - Dilimizə göydən düşən gülməli "sözcüklər".
Guya ki, orfoqrafiya lüğətinə ümumişlək, anlaşıqlı və populyar səciyyəli terminlər daxil edilir. Göründüyü kimi, bunlar nə termindir, nə də populyar. Olsa olsa, təqlidi sözlər olar, onların da lüğətdə nə işi?! Doğrudur, dilin lüğət tərkibi daim yenilənməlidir. Buna sözümüz yox! Amma yenilənmə də qayda-qanuna, dil normalarına söykənməlidir. Bütün bunları da keçdik - Alternativ olaraq "Orfoqrafiya lüğəti" çap etmək nəyə gərək? Alternativ də "Orfoqrafiya lüğəti" olar?!
Vüsalə QƏZƏNFƏRQIZI
