MEK 2017-ci ilin noyabr ayı ərzində beynəlxalq kitab mübadiləsi həyata keçirib
AMEA Mərkəzi Elmi Kitabxanasına 2017-ci ilin noyabr ayı ərzində xarici ölkələrin bir qrup təşkilatları ilə beynəlxalq kitab mübadiləsi (BKM) çərçivəsində 91 nüsxə jurnal daxil olub.
ABŞ-ın "Science News” jurnalının redaksiyası, Nyu-York şəhər Kolleci, Miçiqan Universitet Kitabxanası və Helmintologiya İnstitutunun "Comparative Parasitology”, "Nationalities Papers”, "Great Lakes Botanist”, "The Bryologist” və "Science news” jurnallarının yeni buraxılışlarının ümumilikdə 9 nüsxəsi alınıb. Böyük Britaniyanın "Nature” jurnalının redaksiyasından və Edinburq Kral Cəmiyyətinin Kitabxanasından MEK-ə "Nature” və "The Royal Society of Edinburgh: Proceedings Section A mathematics” jurnallarının altı nömrəsi daxil olub.
Yaponiyanın Milli Kitabxanası, Riyaziyyat Elmləri üzrə Tədqiqat İnstitutu, Kimya Cəmiyyətinin Kitabxanası, Geokimya Cəmiyyəti, Neft-Kimya Cəmiyyəti, Geologiya Cəmiyyətinin Kitabxanası, Mineralogiya Assosiasiyası tərəfindən Azərbaycana "Waseda global forum”, "Journal of mineralogical and petrological sciences”, "Geochemistry”, "Journal of the Mathematical Society of Japan”, "Bulletin of the Chemical Society of Japan”, "Publications of the Research İnstitute for Mathematical Sciences”, "Journal of Oleo Science”, "Marine polymetallic mineral deposits in the vicinity of the Japanese Islands”, "Kyoto Journal of Mathematics” adlı jurnallarının ümumilikdə 19 sayı göndərilib.
Belarus Milli Kitabxanasından bir kitab və dörd jurnal, Almaniyanın Rostok Universitet Kitabxanası, Frankfurt Cəmiyyəti, Potsdam Universitetinin Kitabxanası, Etnoqrafiya Dövlət Muzeyi, Berlin-Brandenburq Elmlər Akademiyasının Kitabxanasından 6 jurnal, Bolqarıstan Milli Kitabxanasından 9 jurnal, Fransanın Milli Tarix Muzeyi, Milli Kitabxanası, Coğrafiya Cəmiyyətinin Kitabxanasından 8 jurnal əldə olunub. Polşanın Mari-Küri Skladovski adına Kitabxanasından iki jurnal, Türkiyənin Türk Dil Qurumundan 15 adda, Sloveniya Elmlər Akademiyası Kitabxanasından 7 adda kitab və jurnallar, İsveçrə Fizika Cəmiyyəti, Bosniya və Herseqovina Elmlər Akademiyasından bir jurnal və Səudiyyə Ərəbistanının İnzibati İdarəetmə İnstitutu tərəfindən bir kitab Mərkəzi Elmi Kitabxanaya daxil olub.
Noyabr ayında Mərkəzi Elmi Kitabxana ilə Türkiyənin Karabük və İtaliyanın Ka Foskari Universitetləri arasında tərəfdaslıq əlaqələri qurulub, İstanbul Orhan Kemal Bölgə Xalq Kitabxanası, Süleymaniye Yazma Əsərlər Kitabxanası, Atatürk Kitaplığı, Beyazit Dövlət Kitabxanası, Ahmet Hamdi Tanpınar Edebiyat Müzey Kitabxanası ilə əməkdaşlığın əsası qoyulub. Ay ərzində MEK-ə Türkiyə kitabxanalarından BKM yolu ilə Türkiyə Dəyanət Vəqfi, İslam Araşdırmaları Mərkəzinin "İSAM Bülteni – 2016", Türkiyə Yazma Əsərlər Qurumu Başkanlığının "Yayın kataloğu" / Istanbul, "Harb-i Umumide Irak Harekatı – Kutül-Amare – Kutül-Amarenin 100 yılı anısına" / İstanbul, 2016, "Beyazıt Devlet Kütübhanesi 125 yaşında" (1884-2009) / İstanbul-2010, Yeditepe Yayınevinin "Revan türkleri: Erivan türk Yurdudur" / İstanbul-2016 və digər adlarda ədəbiyyat daxil olub.
