Uğurlu müəllim dərs saatları içərisində öyrətməyi bacaran şəxsdir

Bəzən müəllimlər elə bilirlər ki, şagirdə nə qədər çox ev tapşırığı versələr dərs o qədər də yaxşı mənimsənilər. Əslində isə evdə davam edən dərs atmosferi səbəbindən uşaqda öyrənmə prosesinə qarşı qıcıq yaranır. Daha dəqiq desək evə verilən tapşırıqlar ailə bağlarını zədələyir.

Uşaq ailə üzvləri ilə vaxt keçirməli olduğu halda gününün tamamını dərsə həsr edir, axşam yatarkən belə dərs haqda düşünür. Üstəlik dərsdən evə gəldikdən sonra tez-tez eşitdiyi "ev tapşırıqlarına nə vaxt başlayacaqsan?” sualı uşağı bezdirir, təlimdən soyumasına səbəb olur. Hələ siz bu sualın uşaq bacı və qardaşları ilə oyun oynayarkən verildiyini düşünün. Bu uşağın yaratdığı xəyal dünyasını məhv etmək deyilsə bəs nədir? Uşağa uşaqlığını yaşatmadan onu gecə-gündüz təlimlə məşğul olmağa yönəltmək haqsızlıqdır.

Biz psixoloq olaraq hər zaman yetkin şəxslərə deyirik ki, "evə iş gətirməyin". Hətta qeyd etməliyəm ki, bu fikir insanlar tərəfindən müsbət qəbul olunur. Bəs nəyə görə bizlər uşaqlarımıza "evə dərs gətirməyin” demirik? Özümüzə qarşı bu qədər anlayışlı ikən uşaqları unutmaq ən böyük səhvimiz deyilmi? Evə iş gətirməyən valideynlərin hər gün fəxrlə qarşıladığı qonağıdır dərslər…

Uşaq məktəbdə öyrənməli, evdə isə ailəsiylə vaxt keçirməyin verdiyi xoşbəxtliyi dadmalıdır. Həyətdə qayğılardan kənar oynamağın həzzini duymalıdır…

Uğurlu müəllim uşağı ailəsindən qoparan yox, ona dərs saatları içərisində öyrətməyi bacaran şəxsdir.