Nazir: "Təhsil alanların gələcək peşə seçimində məktəblərin rolu artmalıdır"
"Gələcəkdə müəllimlik peşəsinin inkişafı ilə bağlı görülməli işlər çoxdur. Müəllimlərin peşəkarlıq səviyyəsinin artırılması, davamlı inkişaf, keyfiyyətlə bağlı hesabatlılıq, təkmilləşmə üçün yeni həllər, ən başlıcası pedaqoqlar üçün üzərlərində işləməyə əlavə stimul verəcək".
Aztəhsil.com report.az-a istinadən xəbər verir ki, Təhsil Naziri Mikayıl Cabbarov müəllimlərin dövlət təltiflərinin təqdimetmə mərasimində çıxışı zamanı deyib.
Onun sözlərinə görə, təhsilalanların gələcək peşə seçimində məktəblərin rolu artmalıdır:
"Bu ildən bütün ölkəni əhatə edən təmayülləşmə buna xidmət edir. Təmayülləşmə yeni yanaşmaların, fərqli öyrənmə mühitinin bərqərar olması, pedaqoji prosesin şagirdlərin meyl və maraqlarına uyğun olması üçün müəllimlərə əlverişli imkan yaradır. Bu imkanı real nəticələrə çevirmək üçün müəllimlərin üzərinə iş düşür. Eyni zamanda milli-mənəvi dəyərlərə əsaslanan vətəndaş tərbiyəsi fəaliyyətin əsas istiqaməti olmalıdır".
Nazir bildirib ki, bölgələrdə yaxşı təlimçi bazasının yaradılması, yerli təhsil qurumlarının bu işdə aktiv fəaliyyətinin təmin edilməsi, distant ixtisasartırma proqramlarının hazırlanması, reiltorluq institutunun yaradılması, internatura proqramlarının işlənməsi xüsusi əhəmiyyət kəsb edir.
