Xankəndi universitetinin tələbələri Laçında məktəblilərlə görüşdü
Erməni tələbələr sabah da Kəlbəcərə yollanacaq...
Bizlərin başı ATƏT-in Minsk Qrupu həmsdərlərinin turist səfərlərinə, monitorinqlərinə, prezidentlərin danışıqlarına qarışarkən ermənilər elə həmin həmsədr ölkələrin dəstəyi ilə işğal etdikləri torpaqlarımızda yaşamlarını davam etdirirlər. Övlad, şagird, tələbə, əsgər böyüdürlər... Bu günlərdə Xankəndindəki "”Artsax” Dövlət Universiteti” adlanan və faktiki fəaliyyət göstərən ali məktəbin tələbələri Laçındakı erməni orta məktəblərindən birində intellektual oyunlar müsabiqəsi təşkil ediblər. Erməni gənclər eyni zamanda 2 saylı uşaq bagçasını da ziyarət edib, uşaqlara hədiyyələr paylayıb, qarşılarında şou-proqramla çıxış ediblər.
Aztəhsil.com xəbər verir ki, bu haqda separatçı rejimə məxsus saytlar xəbər yayıblar. Həmin müsabiqənin universitetdə təşkil olunmuş "Tələbə-şagird-əsgər- Birliyin gücü” adlı proqram çərçivəsində keçirildiyi bildirilir. Oyunlar digər bölgələrdə də təşkil ediləcək. Və sonda qalib komanda "Qarabağ hərəkatının 30 illiyinə” həsr olunmuş ""ArDU” rektoru kuboku” ilə mükafatlandırılacaq. Xəbərdə tələbələrin oktyabrın 14-də Kəlbəcərə yollanacağı bildirilir.
Universitetin tələbələrlə iş üzrə prorektoru Vitya Yaramişyanın sözlərinə görə, bundan əlavə, sözügedən vətənpərvərlik proqramı çərçivəsində hərbi hissələrdə görüşlər də təşkil ediləcək.
