“Abituriyent Məsləhət Mərkəzi” həftənin 5 günü fəaliyyət göstərir
Ali və orta ixtisas təhsili müəssisələrinə ərizə qəbulu martın 4-dən 17-dək internet vasitəsilə aparılacaq. Abituriyentlər ərizə qəbulu ilə bağlı Dövlət İmtahan Mərkəzinin regional bölmələrində, Qərbi Kaspi, Azərbaycan, Bakı Biznes, Odlar Yurdu universitetlərində onlara kömək etmək məqsədilə yaradılmış və ödənişsiz əsaslarla fəaliyyət göstərən “Abituriyent Məsləhət Mərkəzləri”nə müraciət edə bilərlər.
Bu barədə Dövlət İmtahan Mərkəzindən məlumat verilib.
Məsləhət mərkəzində xüsusi treninq keçmiş əməkdaşlar abituriyentlərə tələbə qəbulu qaydaları, ali və orta ixtisas təhsili müəssisələrinə ərizə qəbulu, “Abituriyentin elektron ərizəsi”nin doldurulma və təsdiq edilməsi və s. haqqında ödənişsiz kömək göstərirlər. Abituriyentlər onları maraqlandıran suallarla bağlı məsləhət mərkəzinə müraciət edə bilərlər.
“Abituriyent Məsləhət Mərkəzi” həftənin 5 günü (şənbə və bazar günləri istisna olmaqla) saat 10:00-dan 17:00-dək fəaliyyət göstərir. Məsləhət mərkəzlərinin ünvanları DİM-in saytında yerləşdirilib.
