“Abituriyent” jurnalının son beş ildə Azərbaycan və rus dillərində 111 adda buraxılışı dərc edilib

Dövlət İmtahan Mərkəzinin (DİM) apardığı elmi-metodik və maarifləndirmə işləri "Abituriyent” jurnalının müxtəlif nəşrləri vasitəsilə ictimaiyyətə təqdim olunur. Jurnalda ali təhsil müəssisələrinə təhsilin müxtəlif pillələrinə tələbə qəbulu ilə bağlı rəsmi sənədlər, bu proseslə bağlı abituriyent, namizəd və şagirdlərə zəruri təlimat və göstərişlər (tövsiyələri), qəbul prosesində edilən dəyişikliklərin ətraflı şərhi, imtahan fənlərinin proqramları, fənlər üzrə tapşırıq nümunələri və metodik materiallar dərc edilir.

Bu fikirlər Dövlət İmtahan Mərkəzinin Direktorlar Şurasının sədri Məleykə Abbaszadənin DİM-in yaradılmasının 5-ci ildönümünə həsr olunmuş məqaləsində yer alıb.

Məqalədə qeyd olunub ki, son 5 il ərzində "Abituriyent” jurnalı redaksiyası Azərbaycan və rus dillərində 111 adda (59 nömrə və 52 xüsusi buraxılış) "Abituriyent” jurnalı və onun xüsusi buraxılışları olan "Xüsusi qabiliyyət imtahanları”, "Magistr”, "Rezidentura” və "Dövlət qulluğu” jurnallarını dərc edib. 2016-2021-ci illərdə 1-11-ci sinif dərslikləri əsasında 126 "Qiymətləndirmə tapşırıqları” kitabçaları (Azərbaycan və rus dillərində), fənlər üzrə vəsaitlər, "İngilis dili lüğəti”, "Azərbaycan dilinin orfoqrafiya lüğəti” müvafiq fənn kurikulumlarının təlim nəticələri nəzərə alınmaqla yenidən işlənib hazırlanıb.

Eyni zamanda, ibtidai siniflər (1-4-cü siniflər) üzrə qiymətləndirmə kitabçaları Azərbaycan və rus dillərində ilk dəfə hazırlanıb. Bundan əlavə, Yeni təhsil proqramı (kurikulum) üzrə imtahanlara hazırlaşanlar, yuxarı sinif şagirdləri və müəllimlər üçün vəsaitlər (Azərbaycan və rus dillərində vəsaitlər 16 adda), Test topluları (Azərbaycan və rus dillərində toplular 24 adda), Rezidenturaya qəbula hazırlaşanlar üçün vəsaitlər (Azərbaycan və rus dillərində – 12 adda), Magistraturaya qəbula hazırlaşanlar üçün vəsaitlər (Azərbaycan dilində – 2 adda (İnformatika vəsaiti və Məntiqi təfəkkürü yoxlayan testlər), Dövlət qulluğuna qəbul olmaq istəyənlər üçün "Dövlət qulluğu”na aid vəsaitlər Azərbaycan dilində – 2 adda (Dövlət qulluğuna qəbul üzrə müsabiqəyə hazırlaşanlar üçün təlimat və Dövlət qulluğuna qəbulun test imtahanı mərhələsi üzrə test tapşırıqları toplusu), Elmi-statistik araşdırmaların nəticələrinə dair vəsaitlər Azərbaycan dilində – 77 adda ("Tələbə qəbulunun gender aspektləri” ("Qadınlar statistikada”), "Kənd təsərrüfatı profilli ixtisaslar statistikada” və "Neft-qaz ixtisasları statistikada” və Rayonlar üzrə statistika (74 hər rayon üzrə ayrı kitabça) nəşr olunub.

Məqalə Göndər