2020-ci il üzrə Nobel mükafatı laureatlarının adları açıqlanacaq

Dünyanı bürümüş koronavirus pandemiyasının ağır fəsadlarına baxmayaraq, Nobel Mükafatları Komitəsi bu il də öz ənənəsinə sadiq qalacaq. Belə ki, komitə tərəfindən elmin ayrı-ayrı sahələri üzrə mühüm kəşflərə imza atmış görkəmli alimlərə Nobel mükafatı təqdim olunacaq.

Komitənin rəsmi www.nobelprize.org saytının məlumatına əsasən, 2020-ci ilin Nobel mükafatı laureatları oktyabrın ilk günlərində elan ediləcək. Oktyabrın 5-dən 12-ə kimi davam edən "Nobel həftəliyi" günlərində ilin ən məşhur elm adamlarının adları məlum olacaq.

İlk olaraq oktyabrın 5-də İsveçin Karolinsk İnstitutunda fiziologiya və tibb üzrə Nobel mükafatı sahibinin adı açıqlanacaq. Fizika üzrə laureatın adı oktyabrın 6-da, kimya üzrə namizədin adı oktyabrın 7-də məlum olacaq. Oktyabrın 8-də isə İsveç Akademiyası tərəfindən ədəbiyyat üzrə namizədin adı elan olunacaq. Oktyabrın 9-da Osloda İsveç Nobel İnstitutu tərəfindən sülh mükafatı üzrə namizədin də adı açıqlanacaq.

Alfred Nobelin xatirəsinə iqtisad elmləri üzrə İsveç Bankının mükafatına (Sveriges Riksbank Prize) layiq görüləcək alimin adı oktyabrın 12-də Stokholmda İsveç Kral Elmlər Akademiyası tərəfindən elan olunacaq.

Hazırda Nobel mükafatı fondu 1,12 milyon ABŞ dolları (9 milyon İsveç kronu) təşkil edir.

Qeyd edək ki, mükafatın təqdim edilməsi mərasimi hər il dekabrın 10-da İsveçin və Norveçin paytaxtlarında Alfred Nobelin doğum günündə keçirilir. Fizika, kimya, fiziologiya və təbabət, ədəbiyyat və iqtisadiyyat sahələrində mükafatlar Stokholmda İsveç Kralı tərəfindən, sülhün qorunması sahəsində mükafat isə Osloda Norveç Kralının və kral ailəsi üzvlərinin iştirakı ilə Norveç Nobel Komitəsinin sədri tərəfindən təqdim edilir. muallim.edu.az

Məqalə Göndər