Xəbərlər
08 aprel 2020
1 130
Aydın Mirzəzadə: “ Telelderslərin karantindən sonra da davam etməsini təklif edirəm”
"Mənim hazırda orta məktəbdə oxuyan övladım və ya nəvəm olmadığına görə teledərsləri sistemli şəkildə izləmirəm, amma vaxtaşırı baxıram. Ötən gün Təhsil Nazirliyindən icazə alaraq teledərslərin hazırlandığı mərkəzə getdim”.
Bu sözləri AzEdu.az-a açıqlamasında millət vəkili Aydın Mirzəzadə deyib. O, teledərslərin hazırlandığı 6 nömrəli mərkəzdən xoş təəssüratlarla ayrıldığını bildirib:
"Koronavirus bütün sahələrə olduğu kimi təhsilə də ciddi təsir etdi. Ölkə rəhbərliyi virusun yayılmasının qarşısını almaq məqsədilə ali və orta, ümumtəhsil müəssisələrində tədrisin təxirə salınması ilə bağlı qərar verdi. Ancaq bununla belə Təhsil Nazirliyi bu müddətdə istifadə olunacaq səmərəli metodlar axtardı və çox doğru olaraq televiziya vasitəsilə dərslərin keçirilməsinə üstünlük verildi.
Bir sıra ölkələrdə başqa formalardan istifadə edilsə də, sonradan Azərbaycan formatında dərslərin keçilməsinə üstünlük verdilər. Mənim hazırda orta məktəbdə oxuyan övladım və ya nəvəm olmadığına görə teledərsləri sistemli şəkildə izləmirəm, amma vaxtaşırı baxıram. Tədrisin forması və dərsin izahı mənim çox xoşuma gəlir. Dünən Təhsil Nazirliyindən icazə alaraq teledərslərin hazırlandığı mərkəzə getdim. Bu, Səbail rayonundakı məşhur 6 nömrəli məktəbin binasında yerləşir. Nazirliyin böyük bir kollektivi burada növbəti dərslərin hazırlığını görür. Əvvəldən qrafik tutulub, tədris proqramına uyğun olaraq müəllimlər dəvət olunur. Mənim sualıma cavab olaraq bildirdilər ki, Bakı, Sumqayıt, Abşeron şəhər və məcburi köçkün məktəblərinin ən yaxşı müəllimləri mərkəzə dəvət olunur. Mərkəzdə teledərslərin gedişatını kənardan canlı izləyə bildim. Çəkilişdən sonra çox hazırlıqlı texniki personal dərslərin televiziya versiyasını hazırlayır və hər hansı texniki problemin olmamasına nəzarət edir”.
Onun sözlərinə görə teledərslər məcburiyyətdən yaranmış bu fasiləni doldura bilir. Hətta valideynlərin əksəriyyəti Nazirliyin işçilərinə tədris bərpa olunandan sonra teledərslərin davamı ilə bağlı müracitə edib:
"Mən Təhsil Nazirliyinin, işçilərin, müəllimlərin bu məsələdə fədəkarlığının şahidi oldum. Onlar mənə bildirdilər ki, teledərslərə çox böyük maraq var. Müəllimlər sinif şagirdləri ilə daimi əlaqə saxlayırlar. Valideynlər dərslərə bağlı müraciətlər edirlər və hətta müəyyən bir hissə real tədris müddəti bərpa edildikdən sonra da teledərslərin keçirilməsini təklif edirlər. Çünki valideyn sonradan buna baxaraq öz övladı üçün aydın olmayan hissəni öyrənərək ona izah edə bilir. Teledərslərin keçirilməsi hesab edirəm ki, məcburiyyətdən yaranmış bu fasiləni doldura bilir. Şagirdlərimizin təhsildən geri qalması faktorunu tamamilə istisna edir, ən əsası diqqəti təhsilə yönəldir. İşin təşkili məni çox razı saldı, orda gördüyüm müəllimlərə, təhsil işçilərinə vətəndaş kimi öz təşəkkürümü bildirdim”.
Millət vəkili məktəbin fəaliyyəti ilə maraqlandığını da vurğulayıb:
"6 nömrəli məktəbin direktoru Gülşən xanım Orucova ilə xeyli söhbətimiz oldu. O, bu tədrisdən şəxsən məktəbin şagirdlərinin böyük hissəsinin faydalandığını dilə gətirdi. Mənə məktəbin uğurları da maraqlı idi. 3 dildə-Azərbaycan, rus və ingilis dilində tədris aparılır, məktəbin qəbul faizi də çox yüksəkdir. Ötən il səhv etmirəmsə, 244 nəfər məzun hamısı Azərbaycanda və xaricdə ali məktəblərə qəbul olub. Bu, əlbəttə ki, həm məktəbin, həm də ailələrin uşaqların təhsilinə göstərdiyi diqqətdən irəli gəlir”.
"Teledərslər bugünki vəziyyətdə ən real və ən düzgün çıxış yolu idi. Mən çox istərdim ki, teledərs sistemi bundan sonra da davam etsin”- deyə millət vəkili A. Mirzəzadə sözlərinə əlavə edib.
