Məleykə Abbaszadə qəbul və buraxılış imtahanları ilə bağlı Prezidentə hesabat verəcək

Azərbaycan Respublikasının Dövlət İmtahan Mərkəzi (DİM) Direktorlar növbəti iclası keçirilib.

Aztəhsil.com xəbər verir ki, iclasda DİM tərəfindən 2017-ci ilin dekabr ayı ərzində keçirilmiş imtahanlar, dövlət qulluğu sahəsində görülmüş işlər, qəbul və buraxılış imtahanları ilə bağlı ölkə Prezidentinə təqdim olunacaq illik hesabat, eləcə də Avropa İttifaqının Tvinninq aləti üzrə "Azərbaycan Dövlət Qulluğu sistemində islahatların davam etdirilməsinə dəstək” layihəsi çərçivəsində görülmüş işlər müzakirə edilib.

İlk növbədə, iclasda Şura üzvlərinə Prezident İlham Əliyevə 2017/2018-ci tədris ili üçün ali və orta ixtisas təhsili müəssisələrinə tələbə qəbulu və ümumi təhsil müəssisələri üzrə buraxılış imtahanlarının nəticələri haqqında təqdim olunacaq illik hesabat barədə məlumat verilib. Mərkəzin dövlət qulluğu sahəsində fəaliyyətinə dair hesabatın da hazırlanacağı və ölkə Prezidentinə təqdim olunacağı qeyd olunub.

Mərkəzin dövlət qulluğu sahəsində fəaliyyəti barədə sədr Məleykə Abbaszadə qeyd edib ki, 2017-ci il noyabr və dekabr aylarında inzibati rəhbər və inzibati icraçı vəzifələr üzrə dövlət qulluğuna qəbul üçün ilk test imtahanları keçirilib. Bu imtahanlarda 3 mindən artıq namizəd iştirak edib və onlardan ümumilikdə 1004 namizəd sertifikat əldə etmək hüququ qazanıb. İnzibati vəzifələrin A və B növləri üzrə müsabiqənin müsahibə mərhələsinə dövlət orqanları tərəfindən 1461 vakant vəzifə təqdim olunub. Daha əvvəl keçirilən müsabiqələrdən keçmiş, lakin vakant vəzifəyə təyin edilməmiş 313 namizəd isə ehtiyat kadrlar siyahısına daxil edilib. Ehtiyat kadrların dövlət orqanlarında analoji vəzifəyə təyin olunması ilə bağlı mütəmadi iş aparılır.

Sədr dövlət orqanında vakant dövlət qulluğu vəzifəsinin müddətli əmək müqaviləsi bağlanılmaqla tutulması ilə bağlı bildirib ki, xüsusi hal olaraq vakant vəzifə üzrə əmək funksiyasının icrası zərurətinin olduğu nəzərə alınaraq, işin davam etməsi üçün həmin vəzifənin müsabiqə və müsahibə yolu ilə tutulması müddətinə kimi (əsasən 3 ay müddətinə) işçi ilə müddətli əmək müqaviləsi bağlamaq olar. Bu şərtlə ki, həmin vəzifənin müsabiqə və ya müsahibə yolu ilə tutulması üçün dövlət orqanının rəhbəri qərar qəbul etsin və bu vəzifələr müvafiq elan verilməsi üçün Dövlət İmtahan Mərkəzinə təqdim edilsin. Bəzən elə hallar olur ki, dövlət orqanında müqavilə əsasında çalışan şəxs hesab edir ki, o artıq dövlət qulluqçusudur, lakin əslində həmin şəxs belə statusa malik olmamasından xəbərsiz olur. Artıq bu vətəndaşlar, eləcə də dövlət orqanlarında çalışan digər şəxslər "dövlət qulluqçularının reyestri” xidmətinə daxil olaraq özləri haqqında konkret məlumatlarla tanış ola biləcəklər.

Daha sonra Şura üzvlərinə Avropa İttifaqının Tvinninq aləti üzrə litvalı tərəfdaşlarla birgə həyata keçirilən "Azərbaycan Dövlət Qulluğu sistemində islahatların davam etdirilməsinə dəstək” layihəsi çərçivəsində görülmüş işlər barədə məlumat verilib. Qeyd olunub ki, litvalı ekspertlər DİM əməkdaşları ilə layihənin komponentləri üzrə birgə fəaliyyət göstərir və dövlət orqanları üçün mütəmadi seminarlar təşkil edilir. İl ərzində keçirilmiş 6 seminar və 3 təlimə 250 nəfər dövlət qulluqçusu cəlb edilib.

İclasda digər cari məsələlər də müzakirə olunub.