Azərbaycan Dillər Universitetində yeni formatda dərslərin təşkilinə başlanılıb

Azərbaycan Dillər Universitetinin (ADU) rektoru, akademik Kamal Abdullanın rəhbərliyi ilə bu ali məktəbdə təhsilin inkişafı istiqamətində genişmiqyaslı islahat və layihələr davam etdirilir. Belə ki, rektorun göstərişinə əsasən universitetin kafedraları arasında əməkdaşlığın genişləndirilməsi və tələbələrin elmi potensialının gücləndirilməsi məqsədilə birgə dərslərin keçirilməsinə başlanılıb.

İnteraktiv formatda keçirilən dərslərdə iki lektorun mühazirə deməsi, tələbələrlə mühazirəçilər arasında sərhədin aradan qaldırılması kimi məqamlar dərsə xüsusi maraq qatır və onun keyfiyyətini yüksəldir.

Aztəhsil.com azərtac.az-a istinadən xəbər verir ki, noyabrın 1-də universitetin Azərbaycan ədəbiyyatı kafedrasının müdiri, akademik Muxtar İmanovun təşəbbüsü ilə "Ədəbiyyatda postmodernizm” mövzusunda ilk dərs keçirilib.

ADU-nun Azərbaycan ədəbiyyatı, fəlsəfə və ictimai elmlər kafedralarının birgə fəaliyyəti əsasında təşkil edilən dərsdə azərbaycanşünaslıq elmi-tədqiqat laboratoriyasının müdiri, tarix üzrə fəlsəfə doktoru Aqşin Rüstəmov, müəllim və tələbələr iştirak ediblər.

"Postmodernizmin Azərbaycan ədəbiyyatında təzahürü” mövzusunda çıxış edən, Azərbaycan ədəbiyyatı kafedrasının dosenti Dilbər Zeynalova bildirib ki, dünya ədəbiyyatında geniş yayılan modernist və postmodernist ədəbi-estetik konsepsiyalar ədəbiyyatımızdan da yan keçməyib.

Sosialist realizminin hakim olduğu dövrlərdə sənətkarlarımız fikri, mətləbi Ezop dilində çatdırmağa çalışıblar. Postmodernizmin Azərbaycan ədəbiyyatında konseptual formada akademik Kamal Abdullanın əsərlərində özünü göstərdiyini qeyd edən D.Zeynalova ədəbiyyatımızda kortəbii postmodernizmin də mövcud olduğunu vurğulayıb.

Postmodernizmin fəlsəfi aspektlərindən danışan, ADU-nun fəlsəfə və ictimai elmlər kafedrasının professoru Niyazi Mehdi postmodernizmin prinsipləri, əsas ideyaları və mədəniyyətdə önəmi barədə məlumat verib.

Sonda tələbələrin sualları cavablandırılıb.