“eTwinning Plus” layihəsi çərçivəsində peşəkar inkişaf imkanları
Cari ilin mart ayında “eTwinning” Avropa Mərkəzi Dəstək Xidməti tərəfindən “Öyrənmə məkanları” və “Xarici dilin tədrisində yeni çağırışlar” mövzularında müəllimlər üçün onlayn beynəlxalq inkişaf təlimləri keçirilib.
Təlimlərin əsas məqsədi öyrənmə məkanlarının təkmilləşməsinə xidmət edən üsulların araşdırılması, öyrənmə üslublarına uyğunlaşdırılmış sinif mühitinin formalaşdırılması, inkişaf etməkdə olan tendensiyaların xarici dilin öyrənmə mühitinə təsirini əhatə edib. Bununla yanaşı, hibrid öyrənmə mühitində “edtech” sinif otaqlarının yaradılması təcrübəsi də təlim müddətində təqdim edilib.
Peşəkar inkişaf istiqamətində ölkəmizdən ümumilikdə 5 müəllim təlimlərdə iştirak edib.
Təlimlərdə Azərbaycanla yanaşı Avstriya, Türkiyə, İsveçrə, Tunis, Gürcüstan, Albaniya, İtaliya, Yunanıstan kimi ölkələrin müəllimləri layihə əsaslı təhsil mühitində dəstəkləyici öyrənmə məkanlarının yaradılması istiqamətində beynəlxalq təhsil ekspertlərinin təqdimatlarını dinləyib, qrup işləri zamanı şəxsi təcrübələrini paylaşıblar.
Hər iki təlimin sonunda müəllimlər beynəlxalq sertifikatlarla təltif olunublar.
