Xəbərlər
18 aprel 2017
3 298
Azərbaycan Texnologiya Universitetinin təşəbbüsü ilə fənn olimpiadası keçirilib
Aprelin 15-də Azərbaycan Texnologiya Universitetinin təşəbbüsü ilə Ağstafada rayon məktəbliləri üçün fənn olimpiadası keçirilib.
Olimpiadada rayonun ümümtəhsil məktəblərindən 138 nəfər şagird 3 fənn üzrə bilikləri yoxlayıb. Bir saat davam edən bilik yarışında şagirdlər riyaziyyat, fizika və kimya fənləri üzrə 3 sualı cavablandırıblar. Olimpiadadan sonra şagirdlər universitet tərəfindən təşkil olunan sərgi ilə tanış olublar.
Əvvəlcə ATU-nun Tədris şöbəsinin müdiri Piri Axundov şagirdlərə universitet haqqında geniş məlumat verib. O, gələcəyin tələbələrinə ATU-dakı ölkə iqtisadiyyatı üçün böyük əhəmiyyət kəsb edən mühəndislik ixtisaslarının vacibliyi və perspektivləri barədə danışıb.
Sonra rayon məktəbliləri sərgidə ATU-nun professor-müəllim heyətinin üzvləri tərəfindən aparılan təcrübələrlə, təbliğat materialları və tələbələrin əl işləri ilə tanış olublar. Universitetin əməkdaşları tərəfindən məktəbliləri maraqlandıran suallara ətraflı cavab və izahatlar verilib.
Sonda ATU-nun incəsənət dərnəklərinin üzvü olan tələbələr tərəfindən sərgi iştirakçıları üçün konsert proqramı təşkil edilib.
Nəcibə Vəliyeva(Ağstafa təhsil şöbəsi, ictimaiyyətlə əlaqələr üzrə məsul şəxs)
