Təhsil nazirinə müraciət...

Qarabağ qazisi, Bakı şəhər Suraxanı rayonundakı 281 nömrəli məktəbin müəllimi Vaqif Əlisoy 65 yaşı tamam olması ilə əlaqədar təqaüdə göndərilib. Bununla bağlı təhsil naziri Emin Əmrullayevə ünvanladığı bir müraciətində geniş məlumat verib. İmkanın çatdığı qədər Vaqif müəllimin müraciətinin ictimailəşməsinə çalışdım. Dostumuz millət vəkili Aqil Abbas da məslə ilə bağlı dəstəyini əsirgəmədi. Təəssüf ki, hələ də reaksiya yoxdur. Amma yenə də bu məsələ ilə bağlı təhsil naziri Emin Əmrullayevə müraciət etmək qərarına gəldim.

Hörmətli Emin müəllim, nazir təyin olunduğunuz gün Sizdən müsbət gözləntilərimin olduğunu ifadə edərək müsbət yazı da yazmışdım. Çünki Sizin bizdən biri, halımızdan alnayan nazir olacağınızı düşünürdüm. Hələ də o fikirdəyəm, ümidimi tam itirməmişəm.

Buradan Emin Sizə və Azərbaycan Respublikası Təhsil Nazirliyinin adidiyyatı qurumlarının rəhbərliyinə müraciət edirəm. Bilirəm, qanun qanundur. Amma bəzən istisnalar olmalıdır. Özü də indiki həssas məqamda canını bu Vətənə sipər etmiş, döyüşmüş bir müəllimi sevimli peşəsindən, şagirdlərindən ayırmaq yanlış olar. Lütfən tələsməyin. Bu ölkədə çox adama haqsız yerə güzəşt edilib, bir dəfə də haqqı çatan adama güzəşt eləmək olar.

Vaqif müəllimi təqaüdə göndərməyə tələsmək əvəzinə, güzəşt etməniz daha doğru olar. Bəlkə bir qədər düşünəsiniz və bir Qarabağ qazisinə öz işinə davam etməsinə şərait yaradasınız. Vaqif müəllimin yetirmələrinin qəbul imtahanlarında yüksək nəticələr göstərməsi onun müəllim kimi də uğurlu, peşəkar kadr olduğunu göstərir.

Unutmayın ki, gələcəyimiz olan uşaqlara vətənpərvərliyi öz qanı, canı ilə sübut edənlər daha yaxşı öyrədə bilərlər. Ümid edirəm ki, çoxsaylı müracitələri nəzərə alıb Vaqif Əlisoyun müəllim peşəsinin davam etdirilməsi üçün müvafiq göstəriş verəcəksiniz.

Hörmətlə, Zaur Əhməd