Bakı Dövlət Universiteti məzununun uğuru

Bakı Dövlət Universitetinin (BDU) Hüquq fakültəsinin məzunu Araz Poladov ABŞ-ın Harvard Hüquq Məktəbini əla qiymətlərlə bitirərək, ikinci hüquq üzrə magistr (LL.M.) dərəcəsi alıb.

BDU-dan bildirilib ki, Harvard Hüquq Məktəbi Harvard Universitetinin bir hissəsidir. Dünya hesabatı tərəfindən ABŞ-ın hüquqşünaslıq məktəblərinin ilk beşliyində sıralanır.

Araz Poladov 2012-ci ildə tələbə qəbulu üzrə dövlət imtahanından 669 bal toplayaraq Bakı Dövlət Universitetinin (BDU) Hüquq fakültəsinə qəbul olub. 2016-cı ildə fakültənin fərqlənmə diplomu ilə məzunu olduqdan sonra təhsilini Vyana Universitetində Avropa və beynəlxalq biznes hüququ ixtisası üzrə davam etdirib. 2017-ci ildə Vyana Universitetini də fərqlənmə diplomu ilə bitirərək hüquq üzrə magistr (LL.M.) dərəcəsinə yiyələnib. Sonra Azərbaycana qayıdıb və "Baker McKenzie” beynəlxalq hüquq şirkətində hüquqşünas kimi fəaliyyət göstərib. Eyni zamanda, BDU-nun Hüquq fakültəsində beynəlxalq hüquq və insan hüquqları fənlərini saathesabı əsaslarla ingilis dilində tədris edib. 2018-ci ilin mart ayında İnsan hüquqları və informasiya hüququ üzrə UNESCO kafedrasına fəlsəfə doktoru proqramı üzrə büdcə hesabına əyani doktoranturaya qəbul olunub.

Araz Poladov hazırda Bakı Dövlət Universitetində doktoranturada təhsilini davam etdirir.

Məqalə Göndər