Xəbərlər
12 iyun 2017
3 380
Son illər ali məktəblərə qəbul olanların sayında artım var
Ötən il ali təhsil müəssisələrinə rekord sayda tələbə qəbul olunub.
Təhsil Nazirliyindən verilən xəbərə görə, 2016-cı ildə ali təhsil müəssisələrinə bakalavriat üzrə 34.773 nəfər, magistratura üzrə 4.839 nəfər qəbul olunaraq ümumilikdə 39.612 şəxs tələbə və magistr adını qazanıb.
Son illərdə ölkədə universitet təhsilinə maraq keyfiyyət baxımından artıb. 2014-2015-ci tədris ili üzrə qəbul imtahanlarında bütün qruplar üzrə iştirak edən 92 643 abituriyentin keyfiyyət göstəricisi 34,7 faiz, 2015-2016- cı tədris ili üzrə 82 925 abituriyentin bu nəticəsi 40 faiz olubsa, 2016-2017- cı tədrsi ili üzrə 78 545 abituriyentin analoji göstəricisi 43,9 faiz, 2017-2018-ci tədris ili üzrə (I mərhələ) 64 220 abituriyentin keyfiyyət göstəricisi 48,9 faiz olub. Başqa sözlə, son 4 ildə bu göstərici 14,2 faiz artıb.
Son 4 tədris ili ərzində ali təhsil müəssisələrinə ixtisas qrupları üzrə tələbə qəbulunun keyfiyyət göstəriciləri yaxşılaşıb. I ixtisas qrupunda göstərici 12,8 faiz, II ixtisas qrupunda 10,6 faiz, III ixtisas qrupunda 11,5 faiz, IV ixtisas qrupunda isə 38,4 faiz artıb.
Azərbaycanın ali təhsil müəssisələrinə son iki il ərzində ingilis dilində tədris olunan ixtisaslara tələbə qəbulu artıb. Belə ki, ölkənin 6 dövlət ali təhsil müəssisəsində - Bakı Bövlət Universiteti, Azərbaycan Dövlət Neft və Sənaye Universiteti, Azərbaycan Memarlıq və İnşaat Universiteti, Azərbaycan Dövlət İqtisad Universiteti, Azərbaycan Dillər Universiteti və Bakı Mühəndislik Universitetində ingilis dilində tədris olunan ixtisaslar üzrə proqnoz yerlərinin sayı 780 olub və bu ixtisaslar üzrə cəmi 9 yer boş qalıb. Bu isə 98,8 faiz təşkil edir.
Ölkənin ali təhsil müəssisələrinə əvvəlki illərdə olduğu kimi, qəbul zamanı müsabiqədə iştirak etmək üçün minimal bal əksər ixtisaslar üzrə 200 bal həddində saxlanılıb. Eləcə də ölkə üçün prioritet hesab olunan ixtisaslar, o cümlədən "İnşaat mühəndisliyi”, "Nəqliyyat tikintisi mühəndisliyi”, "Elektronika, telekommunikasiya və radiotexnika mühəndisliyi”, "Kompüter elmləri”, "İnformasiya texnologiyaları” və bu kimi bir sıra ixtisaslar üzrə müsabiqədə iştirak etmək üçün minimal keçid balı yüksələrək 250 və 300 bal müəyyənləşdirilib. Bu da qəbul prosesinin nəticələrinin keyfiyyət göstəricilərinə öz müsbət təsirini göstərir.
Son illərdə nəqliyyat, sənaye və inşaat sektorundakı dinamik inkişafı nəzərə alaraq növbəti tədris ilindən "Sənaye mühəndisliyi”, "Logistika və nəqliyyat texnologiyaları mühəndisliyi” və "Şəhərsalma” ixtisasları üzrə tələbə qəbuluna başlamaq nəzərdə tutulub.
