Zal nəzarətçisi sertifikatı əldə etmək istəyən namizədlərlə müsahibə mərhələsinə başlanılıb

Müsahibə zamanı namizədin ümumi dünyagörüşü, nitqi, stress vəziyyətində işləmək bacarığı yoxlanılır. Bu barədə DİM-dən məlumat verilib.

Namizədlər müsahibə mərhələsində iştirak etmək üçün aşağıdakı sənədləri təqdim edir:

Namizədin elektron anketi;

Şəxsiyyət vəsiqəsi;

Ali təhsil haqqında sənəd (diplom);

İş yeri haqqında arayış;

Məhkumluq barədə arayış.

Müsahibələr DİM-in inzibati binasında (Bakı şəhəri, Yasamal rayonu, Mikayıl Müşfiq küç, 1M) və regional bölmə mərkəzlərində Mərkəzin məsul əməkdaşları tərəfindən aparılır.

Müsahibənin nəticəsi məqbul və ya qeyri-məqbulla qiymətləndirilir. Namizədlər öz nəticələri ilə bağlı məlumatla namizədin elektron anketinə daxil olaraq tanış ola bilərlər. Müsahibədən uğurlu nəticə əldə edən namizədlər ümumi intellekt səviyyəsini yoxlayan test imtahanına dəvət ediləcəklər.

Ehtiyat tədbirləri çərçivəsində namizədlərin elektron termometrlə bədən hərarətləri yoxlanılır, zəruri dezinfeksiyaedici vasitələrdən istifadə olunur. İştirakçılar müsahibəyə tibbi maska ilə gəlməli və onlardan düzgün (burun, ağız və çənə nahiyəsini tam örtməklə) istifadə etməlidirlər.

Qeyd edək ki, hal-hazırda zal nəzarətçisi sertifikatı əldə etmək üçün 198 namizəd qeydiyyatdan keçib.