Xəbərlər / Müəllim
25 may 2020
1 192
"Son 7 ildə 23 000 müəllim işə qəbul edilib"-Murad Camalzadə
İctimai-siyasi tənqidçi Aslan İsmayılov 23 may tarixli paylaşımında təhsil sisteminin mövcud vəziyyətinə dair gəldiyi qənaətlər barədə fikirlərini bildirmişdir.
Sözügedən paylaşımda əsas diqqət ümumi təhsil müəssisələrində şagirdlərin 1-ci sinfə qəbulu mexanizminə yönəldilib. Həmin mexanizmin təşkili prosesində iştirak etmədiyim üçün qeyd olunan məsələyə dair rəy bildirməyim doğru olmasa da, bildiyim qədəri ilə bir neçə ildir ki, bu kütləvi proses elektron qaydada həyata keçirilir və bu da prosesin şəffaflığının təmin edilməsi istiqamətində mühüm addımdır.
Aslan bəyin məlum paylaşımındakı bir ifadəyə rəy bildirməyi bu proseslərin təşkilində birgə əmək sərf etdiyimiz insanların adına özümə borc bilirəm. Belə ki, Aslan bəy qeyd edib ki: "Təhsil sistemində yenə süpürgəçidən tutmuş hamı rüşvət müqabilində işə qəbul edilirlər”.
Dövlət qulluqçusu olaraq, çoxsaylı vəzifə borclarımdan biri vətəndaşların düzgün məlumatla təmin edilməsi və müraciətlərin cavablandırılmasıdır. Təhsil sisteminin qeyd olunan fəaliyyət sahəsi barədə Aslan bəydə yaranmış və ya yaradılmış həqiqəti əks etdirməyən təəssürata aydınlıq gətirməyin cəmiyyətin ümumi işinə xeyir verəcəyi qənaətindəyəm.
Bildirim ki, süpürgəçi olaraq qeyd edilən xadimə vəzifəsi də daxil olmaqla texniki vəzifələrə işə qəbul müəssisə rəhbərləri tərəfindən həyata keçirilir.
Ölkə vətəndaşlarının məşğulluq səviyyəsinin artmasına və təhsilin keyfiyyətinin yüksəldilməsinə birbaşa təsir edən və mənim də məsuliyyət daşıdığım məsələ ümumi təhsil müəssisələrinə müəllimlərin işə qəbulu prosesidir. Pedaqoji istiqamətdə təhsil almış 23.000-nə yaxın vətəndaş 2013-cü ildən etibarən paytaxtın ən nüfuzlu məktəbindən tutmuş ən ucqar kənd məktəblərinə kimi mərkəzləşdirilmiş müsabiqə nəticəsində müxtəlif təhsil müəssisələrinə müddətsiz əsaslarla işə qəbul edilmişdir. Bu faktı şəffaf qaydada işə qəbul edilmiş həmin 23 min insanla dəqiqləşdirmək elə də çətin olmamalıdır.
Ümumiyyətlə, bu kimi proseslər barədə rəy bildirərkən müşahidə olunan problemlərin mənbəyinin düzgün müəyyən edilməsi vacib şərtdir. Son illər ərzində müəllimlərin işə qəbulu prosesində yol verilən neqativ halların aşkara çıxarılması və günahkarların cəzalandırılması sahəsində ən çox əmək sərf edən tərəf elə Təhsil Nazirliyinin özüdür.
Nəzərə almaq lazımdır ki, qeyd olunan sahədə baş verə biləcək mümkün neqativ hallar mərkəzi aparat tərəfindən sanksiyalaşdırılmış fəaliyyət deyil. Əgər kadrların işə qəbulu sahəsində neqativ hallar barədə məlumat varsa, Təhsil Nazirliyi bu məsələni ictimai formada birgə araşdırmağa daim hazırdır.
