"Keçid ballarının aşağı salınması istisna edilmir"....Müsahibə mərhələsi avqustun 13-ü başlayacaq

"MİQ imtahanlarında ən yüksək davamiyyəti riyaziyyat və fiziki tərbiyə müəllimləri göstərib”.

Aztehsil.com mektebgushesi.az-a istinadən məlumat verir ki, bu sözləri "Təhsil İşçilərinin Peşə İnkişafı İnstitutu nəzdində İnsan Resursları Mərkəzinin müdiri Murad Camalzadə Təhsil Tv-də yayımlanan "Həftənin sualı” verilişində deyib. Onun sözlərinə görə, ən yüksək bal toplayanlar isə riyaziyat, tarix və coğrafiya müəllimləridir:

"Keçid balı musiqi, təsviri incəsənət, fiziki tərbiyə üzrə Bakı şəhərində 42 bal, rayon və kəndlərdə 36 bal təşkil edir. Vakansiya seçimi avqustun 8-nə qədər davam edəcək. 7 mindən artıq vakansiya ayrılıb. Vakansiyaların 90%-ə qədəri Azərbaycan, 10%-i Rus bölməsi üzrədir. Onların 60%-i həvəsləndirmə tədbirlərinin tətbiq edildiyi yerlər, 40% isə tətbiq edilmədiyi yerlər üzrə nəzərdə tutulub.

Vakansiya seçimində keçid balını toplayan, ötən ilin nəticələri əsasında müsabiqədə iştirak etmək istəyən və 10 ildən artıq fasiləsiz pedaqoji fəaliyətlə məşğul olan namizədlər iştirak edə bilərlər”.

"Diplomu pedaqoji istiqamətdə olan namizədlər üçün sistemə diplom əlavəsinin daxil edilməsinə ehtiyac yoxdur. Vakansiya seçimi edərkən diplom yüklənməli, vakansiya seçilməli və sonda mütləq təsdiqlənməlidir. Sistemə diplomun yüklənməsi yenilikdir. Namizədlər əvvəlki illərdə diplomlarını, yalnız müsahibə mərhələsində gətirirdilər. Bu da bir sıra problemlərə yol açırdı. Diplomları pedaqoji istiqamətdə olmayan şəxs müsahibə mərhələsinə gəlirdi. Beləliklə, həmin şəxs vaxt və fiziki güc itirirdi, biz isə isə vakant yer. İndiki məqamda diplomların yüklənməsi əsas mərhələdir. Namizədlər seçim edərkən maksimum diqqətli olmalı, seçdikləri məktəbin hansı ünvanda yerləşdiyini yaxından öyrənməlidirlər. Bəzən şəxs müsahibəyə gəlir, vakant yerə qəbul olunur. Ancaq düşdüyü məktəbin ünvanını öyrəndikdən sonra imtina edir. Belə olan halda həmin məktəbdə çalışmaq istəyən namizədin haqqına girmiş olur, eyni zamanda biz yenə vakansiya itiririk.

Müsahibə mərhələsi avqustun 13-də başlayacaq. Nə qədər davam edəcəyini demək isə çətindir.

Namizədlərdən xahiş edirik ki, düşdükləri vakansiyadan imtina etmək istədikdə avqustun 28-dək İnsan Resursları Mərkəzində imtina ərizəsi yazsınlar. Vakansiyaya düşüb imtina edən şəxslər növbəti yerləşdirmədə iştirak edə bilməyəcək.

Müsahibə mərhələsində iştirakla bağlı heç bir məhdudiyyət yoxdur. Hazırda işləyən şəxslər də bu mərhələdə iştirak edə bilərlər.

Avqustunun sonlarına keçid balını toplayan və müddətli müqavilə əsasında çalışmaqistəyən şəxslər yenidən vakansiya seçimi edə bilərlər. Dərs ili başlayana qədər belə vakansiyalar aparılacaq. Bu mərhələdə keçid ballarının bir qədər aşağı salınması istisna edilmir”.