Xəbərlər / Müəllim
27 aprel 2020
2 190
Nazir təhsildəki vəziyyətdən DANIŞDI
Koronavirus pandemiyası ilə əlaqədar olaraq ölkədə tətbiq olunan karantin rejimi Təhsil sektoruna da öz təsirini göstərdi. Lakin Təhsil Nazirliyi tərəfindən çevik addımlar atıldı. Azərbaycan bölməsində, daha sonra isə rus bölməsində teledərslərə start verildi. Aprelin 29-da teledərslərin 1000-ci buraxılışı efirə gedəcək.
Bu sözləri aprelin 25-də Azərbaycan Respublikası Nazirlər Kabineti yanında Operativ Qərargahda keçirilən brifinqdə Təhsil naziri Ceyhun Bayramov deyib.
Nazir qeyd edib ki, təhsil sahəsində görülən tədbirlər koronavirus pandemiyasının təhsil sisteminə mənfi təsirlərinin qarşısını aldı.
Təhsil Nazirliyinin "Virtual məktəb” layihəsində 600 min şagird və 50 min müəllim qeydiyyatdan keçib.
Nazir qeyd edib ki, "Virtual məktəb” şagirdlərin onlayn tədrisdə daha fəal olmalarına imkan verir.
Ceyhun Bayramovun sözlərinə görə, koronovirus pandemiyası dövründə Azərbaycanda 95 min tələbə onlayn platformalar üzərindən təhsil alır.
Təhsil Nazirliyinin 146-3 qaynar xəttinə 700-dən artıq müraciət daxil olub.
Ceyhun Bayramov deyib ki, qaynar xətdə müraciət edənlərə lazımi psixoloji yardım göstərilib.
