ADAU-da ingilis bölməsində təhsil alan tələbələrə əlavə təqaüd verilib

Azərbaycan Dövlət Aqrar Universitetində (ADAU) təhsilin beynəlmillələşməsi, beynəlxalq əmək bazarının tələbələrinə cavab verən, o cümlədən BMT-nin Dünya Ərzaq və Kənd Təsərrüfatı Təşkilatı kimi beynəlxalq qurumlarda çalışmaq üçün mütəxəssis hazırlığının həyata keçirilməsi məqsədilə digər tədbirlərlə yanaşı "aqronomluq”, "iqtisadiyyat” və "dünya iqtisadiyyatı” ixtisasları üzrə ingilis dilində tədris aparılır.

Aztəhsil.com apa-ya istinadən xəbər verir ki, "Aqronomluq” ixtisası üzrə ingilis dilində tədrisə 2017/2018-ci tədris ilindən başlanılıb. Növbəti tədris ili üçün "topaqşünaslıq və aqrokimya”, "baytarlıq” ixtisasları üzrə də bu bölmədə mütəxəssis hazırlığının həyata keçirilməsi nəzərdə tutulur.

Qeyd etmək lazımdır ki, bütün bunlar üçün universitetdə hərtərəfli şərait yaradılıb, ümumiyyətlə, xarici dillərdə tədris aparıan müəllimlərin sayı artırılmış, onların pedaqoji fəaliyyəti stimullaşdırılıb.

Bütövlükdə, universitetdə beynəlxalq əmək bazarının tələblərinə cavab verən mütəxəssis hazırlığına əlavə dəstək məqsədilə universitet Elmi Şurasının qərarı ilə ingilis bölməsində təhsil alan 56 tələbəyə büdcədənkənar vəsait hesabına ayda 50 manat əlavə təqaüdün verilməsi barədə qərar qəbul edilib.

Qeyd etmək lazımdır ki, universitetdə 11, o cümlədən "aqronomluq” ixtisası üzrə mütəxəssis hazırlığı yalnız dövlət sifarişi əsasında aparılır, yəni bu ixtisaslar üzrə təhsil alan tələbələr təhsil haqqından azad olunmaqla yanaşı aylıq təqaüdlə təmin olunurlar.

Məqalə Göndər